ਫੌਜਾ ਸਿੰਘ ਹਿੱਟ-ਐਂਡ-ਰਨ: ਮੁਲਜ਼ਮ ਨੂੰ ਨਿਆਂਇਕ ਹਿਰਾਸਤ
ਜਲੰਧਰ ’ਚ ਮੈਰਾਥਨ ਦੌੜਾਕ ਫੌਜਾ ਸਿੰਘ ਨੂੰ ਫਾਰਚੂਨਰ ਵਾਹਨ ਨਾਲ ਟੱਕਰ ਮਾਰ ਕੇ ਭੱਜਣ ਵਾਲੇ ਐੱਨਆਰਆਈ ਅੰਮ੍ਰਿਤਪਾਲ ਸਿੰਘ ਢਿੱਲੋਂ ਨੂੰ ਪੁਲੀਸ ਨੇ 30 ਘੰਟਿਆਂ ’ਚ ਗ੍ਰਿਫ਼ਤਾਰ ਕਰ ਲਿਆ। ਅਦਾਲਤ ਨੇ ਉਸ ਨੂੰ ਦੋ ਹਫ਼ਤਿਆਂ ਦੀ ਨਿਆਂਇਕ ਹਿਰਾਸਤ ’ਚ ਭੇਜਿਆ। ਪੁਲੀਸ ਨੇ ਸੀਸੀਟੀਵੀ ਫੁਟੇਜ, ਵਾਹਨ ਦੇ ਟੁੱਟੇ ਹਿੱਸੇ ਅਤੇ ਬੀਮਾ ਰਿਕਾਰਡਾਂ ਦੀ ਮਦਦ ਨਾਲ ਮੁਲਜ਼ਮ ਨੂੰ ਫੜਿਆ। ਅੰਮ੍ਰਿਤਪਾਲ ਨੇ ਜੁਰਮ ਕਬੂਲ ਕਰ ਲਿਆ ਅਤੇ ਦੱਸਿਆ ਕਿ ਉਹ ਕੈਨੇਡਾ ਤੋਂ ਵਾਪਸ ਆਇਆ ਸੀ।
ਮਹਾਨ ਮੈਰਾਥਨ ਦੌੜਾਕ ਫੌਜਾ ਸਿੰਘ ਨੂੰ ਆਪਣੇ ਵਾਹਨ ਨਾਲ ਟੱਕਰ ਮਾਰ ਕੇ ਭੱਜਣ ਵਾਲੇ ਐੱਨਆਰਆਈ ਅੰਮ੍ਰਿਤਪਾਲ ਸਿੰਘ ਢਿੱਲੋਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ। ਜਲੰਧਰ ਪੁਲੀਸ ਨੇ ਮੁਲਜ਼ਮ ਦੇ ਰਿਮਾਂਡ ਦੀ ਮੰਗ ਕੀਤੀ, ਪਰ ਅਦਾਲਤ ਨੇ ਅੰਮ੍ਰਿਤਪਾਲ ਨੂੰ ਦੋ ਹਫ਼ਤਿਆਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ। ਜਲੰਧਰ ਦਿਹਾਤੀ ਪੁਲੀਸ ਨੇ ਕਿਹਾ ਕਿ ਉਨ੍ਹਾਂ ਨੇ 30 ਘੰਟਿਆਂ ਵਿੱਚ ਹੀ ਇਸ ਹਿੱਟ-ਐਂਡ-ਰਨ ਮਾਮਲੇ ਨੂੰ ਸੁਲਝਾ ਲਿਆ ਅਤੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਕੈਨੇਡਾ ਅਧਾਰਿਤ ਐੱਨਆਰਆਈ ਅੰਮ੍ਰਿਤਪਾਲ ਸਿੰਘ ਢਿੱਲੋਂ ਨੇ ਕਿਹਾ ਕਿ ਉਸ ਨੂੰ ਪਤਾ ਸੀ ਕਿ ਉਸ ਦੀ ਫਾਰਚੂਨਰ ਵਾਹਨ ਨਾਲ ਕੋਈ ਬਜ਼ੁਰਗ ਟਕਰਾਇਆ, ਪਰ ਉਸ ਨੂੰ ਦੇਰ ਰਾਤ ਪਤਾ ਲੱਗਾ ਕਿ ਇਹ ਮਹਾਨ ਮੈਰਾਥਨ ਦੌੜਾਕ ਫੌਜਾ ਸਿੰਘ ਸੀ, ਜਿਸ ਦੀ ਜਾਨ ਚਲੀ ਗਈ। ਅੰਮ੍ਰਿਤਪਾਲ ਨੂੰ ਉਮੀਦ ਨਹੀਂ ਸੀ ਕਿ ਜਲੰਧਰ ਪੁਲੀਸ ਉਸ ਨੂੰ ਇੰਨੀ ਜਲਦੀ ਫੜ ਲਵੇਗੀ, ਕਿਉਂਕਿ ਉਹ ਫਾਰਚੂਨਰ ਵਾਹਨ ਦਾ ਤੀਜਾ ਖ਼ਰੀਦਦਾਰ ਸੀ ਅਤੇ ਕਾਰ ਉਸ ਦੇ ਨਾਮ ’ਤੇ ਰਜਿਸਟਰਡ ਵੀ ਨਹੀਂ ਸੀ।
ਜਲੰਧਰ ਦਿਹਾਤੀ ਪੁਲੀਸ ਦੇ ਐੱਸਐੱਸਪੀ ਹਰਵਿੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ ਮੁਲਜ਼ਮ ਅੰਮ੍ਰਿਤਪਾਲ ਸਿੰਘ ਢਿੱਲੋਂ ਸੋਚਦਾ ਸੀ ਕਿ ਇਸ ਹਾਈ-ਪ੍ਰੋਫਾਈਲ ਹਿੱਟ-ਐਂਡ-ਰਨ ਮਾਮਲੇ ਦੀ ਜਾਂਚ ਇੰਨੀ ਤੇਜ਼ੀ ਨਾਲ ਨਹੀਂ ਹੋਵੇਗੀ। ਪੁਲੀਸ ਨੇ ਉਸ ਨੂੰ ਕੱਲ੍ਹ ਸ਼ਾਮ ਉਸ ਦੇ ਘਰ ਤੋਂ ਗ੍ਰਿਫ਼ਤਾਰ ਕਰ ਲਿਆ। ਜਲੰਧਰ ਪੁਲੀਸ ਦੀ ਟੀਮ, ਜਿਸ ਵਿੱਚ ਐੱਸਐੱਸਪੀ ਹਰਵਿੰਦਰ ਸਿੰਘ ਵਿਰਕ, ਐੱਸਪੀ ਸਰਬਜੀਤ ਰਾਏ, ਪਰਮਿੰਦਰ ਹੀਰ, ਡੀਐੱਸਪੀ ਆਦਮਪੁਰ ਕੁਲਵੰਤ ਸਿੰਘ, ਇੰਸਪੈਕਟਰ ਹਰਦੇਵਪ੍ਰੀਤ ਸਿੰਘ ਅਤੇ ਪੁਸ਼ਪ ਬਾਲੀ ਸ਼ਾਮਲ ਸਨ, ਨੇ ਸੁਰਾਗ ’ਤੇ ਕੰਮ ਕਰਕੇ ਮੁਲਜ਼ਮ ਨੂੰ ਫੜਿਆ। ਐੱਸਐੱਸਪੀ ਨੇ ਕਿਹਾ ਕਿ ਅੰਮ੍ਰਿਤਪਾਲ ਨੇ ਪੁਲੀਸ ਨੂੰ ਚਕਮਾ ਦੇਣ ਲਈ ਕਈ ਤਰੀਕੇ ਅਪਣਾਏ। ਫੌਜਾ ਸਿੰਘ ਨੂੰ ਟੱਕਰ ਮਾਰਨ ਤੋਂ ਬਾਅਦ ਉਹ ਹਾਈਵੇਅ ਤੋਂ ਭੱਜ ਗਿਆ ਅਤੇ ਪਿੰਡਾਂ ਦੇ ਕੱਚੇ ਰਸਤਿਆਂ ਰਾਹੀਂ ਆਪਣੇ ਘਰ ਪਹੁੰਚਿਆ। ਇਸ ਕਾਰਨ ਸੀਸੀਟੀਵੀ ਫੁਟੇਜ ਬਹੁਤੀ ਨਹੀਂ ਮਿਲੀ, ਪਰ ਜੋ ਵੀ ਫੁਟੇਜ ਮਿਲੀ, ਉਹ ਫ਼ੈਸਲਾਕੁਨ ਸੀ।
ਘਰ ਪਹੁੰਚ ਕੇ ਅੰਮ੍ਰਿਤਪਾਲ ਨੇ ਫਾਰਚੂਨਰ ਵਾਹਨ ਨੂੰ ਗੈਰਾਜ ’ਚ ਲੁਕਾ ਦਿੱਤਾ। ਹਿੱਟ-ਐਂਡ-ਰਨ ਮਗਰੋਂ ਉਸ ਦੀ ਗੱਡੀ ਦੀ ਖੱਬੀ ਹੈੱਡਲਾਈਟ ਨੁਕਸਾਨੀ ਗਈ ਸੀ, ਪਰ ਉਸ ਨੇ ਇਸ ਦੀ ਮੁਰੰਮਤ ਨਹੀਂ ਕਰਵਾਈ। ਉਸ ਨੇ ਆਪਣੀ ਸਾਈਕਲ ਦੀ ਵਰਤੋਂ ਸ਼ੁਰੂ ਕਰ ਦਿੱਤੀ ਅਤੇ ਆਮ ਵਾਂਗ ਘੁੰਮਦਾ ਰਿਹਾ। ਐੱਸਐੱਸਪੀ ਹਰਵਿੰਦਰ ਸਿੰਘ ਵਿਰਕ ਨੇ ਗ੍ਰਿਫ਼ਤਾਰੀ ਦੇ ਸਬੂਤ ਸਾਂਝੇ ਕਰਦਿਆਂ ਦੱਸਿਆ ਕਿ ਹਾਦਸੇ ਵਾਲੀ ਥਾਂ ’ਤੇ ਵਾਹਨ ਦੇ ਟੁੱਟੇ ਹਿੱਸੇ ਮਿਲੇ, ਜਿਨ੍ਹਾਂ ਨਾਲ ਫਾਰਚੂਨਰ ਵਾਹਨ ਦੀ ਪਛਾਣ ਹੋਈ। ਪੁਲੀਸ ਨੇ ਇਨ੍ਹਾਂ ਵਾਹਨ ਦੇ ਹਿੱਸਿਆਂ ਨੂੰ ਕਾਰ ਏਜੰਸੀ ਨੂੰ ਦਿਖਾਇਆ, ਜਿਸ ਨਾਲ 2009 ਦਾ ਮਾਡਲ ਪਤਾ ਲੱਗਾ। ਅਖੀਰ ’ਚ ਫਾਰਚੂਨਰ ਦੇ ਬੀਮਾ ਰਿਕਾਰਡਾਂ ’ਚ ਅੰਮ੍ਰਿਤਪਾਲ ਦਾ ਫ਼ੋਨ ਨੰਬਰ ਮਿਲਿਆ। ਜਦੋਂ ਜਲੰਧਰ ਪੁਲੀਸ ਟੀਮ ਉਸ ਦੇ ਘਰ ਪਹੁੰਚੀ, ਉਸ ਨੇ ਜੁਰਮ ਕਬੂਲ ਕਰ ਲਿਆ।
ਪੁੱਛ-ਪੜਤਾਲ ’ਚ ਅੰਮ੍ਰਿਤਪਾਲ ਨੇ ਦੱਸਿਆ ਕਿ ਉਹ 23 ਜੂਨ ਨੂੰ ਐਮਰਜੈਂਸੀ ਸਰਟੀਫਿਕੇਟ ’ਤੇ ਭਾਰਤ ਵਾਪਸ ਆਇਆ ਸੀ, ਕਿਉਂਕਿ ਉਸ ਦਾ ਭਾਰਤੀ ਪਾਸਪੋਰਟ ਕੈਨੇਡਾ ’ਚ ਗੁਆਚ ਗਿਆ ਸੀ। ਪਲੱਸ ਟੂ ਪਾਸ ਇਹ ਨੌਜਵਾਨ ਟੂਰਿਸਟ ਵੀਜ਼ੇ ’ਤੇ ਕੈਨੇਡਾ ਗਿਆ ਸੀ, ਪਰ ਉਥੇ ਵਰਕ ਪਰਮਿਟ ਮਿਲ ਗਿਆ, ਜੋ 2027 ਤੱਕ ਵੈਧ ਹੈ।
What's Your Reaction?
