ਬਾਕਸ ਆਫ਼ਿਸ ’ਤੇ 'ਰਾਮਾਇਣ: ਪਾਰਟ 1' ਦਾ ਤੂਫ਼ਾਨ: ਆਲਮੀ ਪੱਧਰ ’ਤੇ 500 ਕਰੋੜ ਤੋਂ ਵੱਧ ਦੀ ਕਮਾਈ; ਭਾਰਤ ’ਚ ਚਾਰ ਦਿਨਾਂ ਅੰਦਰ ਕਮਾਏ ₹285 ਕਰੋੜ, ਗਲੋਬਲ ਚਾਰਟ ’ਤੇ ਦੂਜੇ ਨੰਬਰ ’ਤੇ ਰਹੀ ਫ਼ਿਲਮ
ਰਣਬੀਰ ਕਪੂਰ ਅਤੇ ਸਾਈ ਪੱਲਵੀ ਦੀ ਮੁੱਖ ਭੂਮਿਕਾਵਾਂ ਵਾਲੀ ਬਹੁ-ਚਰਚਿਤ ਮੈਗਾ ਬਜਟ ਫ਼ਿਲਮ "ਰਾਮਾਇਣ: ਪਾਰਟ 1" ਨੇ ਰਿਲੀਜ਼ ਹੁੰਦਿਆਂ ਹੀ ਦੁਨੀਆ ਭਰ ਦੇ ਸਿਨੇਮਾਘਰਾਂ ਵਿੱਚ ਕਮਾਈ ਦੇ ਨਵੇਂ ਇਤਿਹਾਸ ਰਚ ਦਿੱਤੇ ਹਨ। ਨਿਤੇਸ਼ ਤਿਵਾਰੀ ਦੇ ਨਿਰਦੇਸ਼ਨ ਹੇਠ ਬਣੀ ਇਸ ਫ਼ਿਲਮ ਨੇ ਆਲਮੀ ਬਾਕਸ ਆਫ਼ਿਸ 'ਤੇ ਸ਼ੁਰੂਆਤੀ ਦਿਨਾਂ ਵਿੱਚ ਹੀ 55.7 ਮਿਲੀਅਨ ਅਮਰੀਕੀ ਡਾਲਰ (500 ਕਰੋੜ ਰੁਪਏ ਤੋਂ ਵੱਧ) ਦਾ ਅੰਕੜਾ ਪਾਰ ਕਰ ਲਿਆ ਹੈ। ਭਾਰਤ ਵਿੱਚ ਫ਼ਿਲਮ ਨੇ ਪਹਿਲੇ ਚਾਰ ਦਿਨਾਂ ਦੌਰਾਨ 285.20 ਕਰੋੜ ਰੁਪਏ ਦਾ ਸ਼ਾਨਦਾਰ ਗ੍ਰੌਸ ਕਾਰੋਬਾਰ ਕੀਤਾ ਹੈ, ਜਦਕਿ ਵਿਦੇਸ਼ੀ ਬਾਜ਼ਾਰਾਂ—ਅਮਰੀਕਾ ਵਿੱਚ 114 ਕਰੋੜ ਰੁਪਏ ($12.2 ਮਿਲੀਅਨ) ਅਤੇ ਹੋਰਨਾਂ 37 ਦੇਸ਼ਾਂ ਵਿੱਚ 108 ਕਰੋੜ ਰੁਪਏ ($11.5 ਮਿਲੀਅਨ)—ਵਿੱਚ ਵੀ ਫ਼ਿਲਮ ਨੇ ਰਿਕਾਰਡ ਤੋੜ ਪ੍ਰਦਰਸ਼ਨ ਕੀਤਾ ਹੈ। ਦੋ ਭਾਗਾਂ ਦੀ ਇਹ ਪੌਰਾਣਿਕ ਗਾਥਾ ਕਥਿਤ ਤੌਰ 'ਤੇ 4,000 ਕਰੋੜ ਰੁਪਏ ਦੇ ਵਿਸ਼ਾਲ ਬਜਟ ਨਾਲ ਤਿਆਰ ਕੀਤੀ ਗਈ ਹੈ।
ਭਾਰਤੀ ਸਿਨੇਮਾ ਦੀ ਸਭ ਤੋਂ ਮਹਿੰਗੀ ਅਤੇ ਅਭਿਲਾਸ਼ੀ ਪੇਸ਼ਕਸ਼ ਮੰਨੀ ਜਾ ਰਹੀ ਨਿਰਦੇਸ਼ਕ ਨਿਤੇਸ਼ ਤਿਵਾਰੀ ਦੀ ਫ਼ਿਲਮ "ਰਾਮਾਇਣ: ਪਾਰਟ ਵਨ" ਨੇ ਬਾਕਸ ਆਫ਼ਿਸ 'ਤੇ ਧਮਾਕੇਦਾਰ ਸ਼ੁਰੂਆਤ ਕਰਦਿਆਂ ਆਲਮੀ ਪੱਧਰ 'ਤੇ ਕਮਾਈ ਦਾ ਵੱਡਾ ਰਿਕਾਰਡ ਕਾਇਮ ਕੀਤਾ ਹੈ। 5 ਨਵੰਬਰ ਨੂੰ ਵਿਸ਼ਵ ਭਰ ਦੇ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਇਸ ਫ਼ਿਲਮ ਨੇ ਸ਼ੁਰੂਆਤੀ ਚਾਰ-ਪੰਜ ਦਿਨਾਂ ਦੇ ਅੰਦਰ ਹੀ ਦੁਨੀਆ ਭਰ ਵਿੱਚੋਂ 55.7 ਮਿਲੀਅਨ ਅਮਰੀਕੀ ਡਾਲਰ (500 ਕਰੋੜ ਰੁਪਏ ਤੋਂ ਵੱਧ) ਦੀ ਕਮਾਈ ਕਰ ਲਈ ਹੈ। ਆਲਮੀ ਬਾਕਸ ਆਫ਼ਿਸ ਚਾਰਟ 'ਤੇ ਇਹ ਜਾਪਾਨ ਦੀ ਫ਼ਿਲਮ "ਗੋਡਜ਼ਿਲਾ ਮਾਈਨਸ ਜ਼ੀਰੋ" ($63 ਮਿਲੀਅਨ) ਤੋਂ ਬਾਅਦ ਦੂਜੇ ਸਥਾਨ 'ਤੇ ਕਾਬਜ਼ ਹੋ ਗਈ ਹੈ।
ਨਮਿਤ ਮਲਹੋਤਰਾ ਦੇ ਪ੍ਰਾਈਮ ਫੋਕਸ ਸਟੂਡੀਓਜ਼ ਵੱਲੋਂ ਆਸਕਰ ਜੇਤੂ ਵਿਜ਼ੂਅਲ ਇਫੈਕਟਸ ਕੰਪਨੀ ਡੀ.ਐੱਨ.ਈ.ਜੀ. (DNEG) ਅਤੇ ਕੰਨੜ ਸੁਪਰਸਟਾਰ ਯਸ਼ ਦੀ 'ਮੌਨਸਟਰ ਮਾਈਂਡ ਕ੍ਰਿਏਸ਼ਨਜ਼' ਦੇ ਸਹਿਯੋਗ ਨਾਲ ਬਣਾਈ ਗਈ ਇਸ ਫ਼ਿਲਮ ਨੂੰ ਘਰੇਲੂ ਅਤੇ ਕੌਮਾਂਤਰੀ ਦਰਸ਼ਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਫ਼ਿਲਮ ਦੀ ਕੁੱਲ ਕਮਾਈ ਦਾ ਸਭ ਤੋਂ ਵੱਡਾ ਹਿੱਸਾ ਭਾਰਤੀ ਬਾਜ਼ਾਰ ਵਿੱਚੋਂ ਆਇਆ ਹੈ, ਜਿੱਥੇ ਇਸ ਨੇ ਪਹਿਲੇ ਚਾਰ ਦਿਨਾਂ ਵਿੱਚ 285.20 ਕਰੋੜ ਰੁਪਏ (ਗ੍ਰੌਸ) ਦਾ ਕਾਰੋਬਾਰ ਕੀਤਾ ਹੈ।
ਕੌਮਾਂਤਰੀ ਵਪਾਰਕ ਰਿਪੋਰਟ 'ਡੈੱਡਲਾਈਨ' (Deadline) ਮੁਤਾਬਕ ਫ਼ਿਲਮ ਦੇ ਵਿਦੇਸ਼ੀ ਡਿਸਟ੍ਰੀਬਿਊਟਰ ਸੋਨੀ ਪਿਕਚਰਜ਼ ਰਾਹੀਂ ਉੱਤਰੀ ਅਮਰੀਕਾ (ਯੂ.ਐੱਸ.) ਵਿੱਚ 12.2 ਮਿਲੀਅਨ ਅਮਰੀਕੀ ਡਾਲਰ (114 ਕਰੋੜ ਰੁਪਏ ਤੋਂ ਵੱਧ) ਅਤੇ ਹੋਰ 37 ਅੰਤਰਰਾਸ਼ਟਰੀ ਖੇਤਰਾਂ ਵਿੱਚੋਂ 11.5 ਮਿਲੀਅਨ ਅਮਰੀਕੀ ਡਾਲਰ (108 ਕਰੋੜ ਰੁਪਏ ਤੋਂ ਵੱਧ) ਦੀ ਕਮਾਈ ਇਕੱਠੀ ਕੀਤੀ ਗਈ ਹੈ।
ਭਾਰਤੀ ਬਾਕਸ ਆਫ਼ਿਸ ਟਰੈਕਰ 'ਸੈਕਨਿਲਕ' (Sacnilk) ਦੇ ਅੰਕੜਿਆਂ ਅਨੁਸਾਰ ਫ਼ਿਲਮ ਨੇ ਵੀਰਵਾਰ 5 ਨਵੰਬਰ ਨੂੰ 64.85 ਕਰੋੜ ਰੁਪਏ ਨਾਲ ਸ਼ਾਨਦਾਰ ਓਪਨਿੰਗ ਲਈ ਸੀ। ਸ਼ੁੱਕਰਵਾਰ ਨੂੰ ਕਮਾਈ 48.05 ਕਰੋੜ ਰਹੀ, ਪਰ ਸ਼ਨਿੱਚਰਵਾਰ ਨੂੰ ਜ਼ਬਰਦਸਤ ਉਛਾਲ ਨਾਲ ਇਸ ਨੇ 69.80 ਕਰੋੜ ਰੁਪਏ ਦਾ ਸਭ ਤੋਂ ਵੱਡਾ ਸਿੰਗਲ-ਡੇਅ ਸੰਗ੍ਰਹਿ ਦਰਜ ਕੀਤਾ। ਐਤਵਾਰ ਨੂੰ ਫ਼ਿਲਮ ਨੇ 56.15 ਕਰੋੜ ਅਤੇ ਸੋਮਵਾਰ ਨੂੰ ਵੀ ਆਪਣੀ ਪਕੜ ਮਜ਼ਬੂਤ ਰੱਖਦਿਆਂ ਸ਼ਾਮ ਤੱਕ ਲਗਭਗ 49.69 ਕਰੋੜ ਰੁਪਏ ਦਾ ਸ਼ਾਨਦਾਰ ਕਾਰੋਬਾਰ ਕੀਤਾ।
ਭਗਵਾਨ ਸ੍ਰੀ ਰਾਮ ਦੇ ਬਨਵਾਸ, ਮਾਤਾ ਸੀਤਾ ਦੇ ਹਰਨ ਅਤੇ ਬਦੀ ਉੱਤੇ ਨੇਕੀ ਦੀ ਜਿੱਤ ਦੇ ਮਹਾਨ ਯੁੱਧ ਨੂੰ ਦਰਸਾਉਂਦੀ ਇਸ ਫ਼ਿਲਮ ਵਿੱਚ ਰਣਬੀਰ ਕਪੂਰ (ਭਗਵਾਨ ਰਾਮ) ਅਤੇ ਸਾਈ ਪੱਲਵੀ (ਮਾਤਾ ਸੀਤਾ) ਮੁੱਖ ਭੂਮਿਕਾਵਾਂ ਵਿੱਚ ਹਨ। ਫ਼ਿਲਮ ਦਾ ਸੰਗੀਤ ਆਸਕਰ ਜੇਤੂ ਹਾਲੀਵੁੱਡ ਸੰਗੀਤਕਾਰ ਹੰਸ ਜ਼ਿਮਰ (Hans Zimmer) ਅਤੇ ਏ.ਆਰ.ਰਹਿਮਾਨ ਵੱਲੋਂ ਸਾਂਝੇ ਤੌਰ 'ਤੇ ਤਿਆਰ ਕੀਤਾ ਗਿਆ ਹੈ, ਜਦਕਿ ਐਕਸ਼ਨ ਸੀਨਜ਼ ਨੂੰ ਹਾਲੀਵੁੱਡ ਦੇ ਮਾਹਿਰ ਟੈਰੀ ਨੋਟਰੀ ਅਤੇ ਗਾਈ ਨੋਰਿਸ ਨੇ ਡਿਜ਼ਾਈਨ ਕੀਤਾ ਹੈ। ਲਗਭਗ 4,000 ਕਰੋੜ ਰੁਪਏ ਦੇ ਅਨੁਮਾਨਿਤ ਬਜਟ ਨਾਲ ਬਣ ਰਹੀ ਦੋ ਭਾਗਾਂ ਦੀ ਇਹ ਫ਼ਿਲਮ ਭਾਰਤੀ ਸਿਨੇਮਾ ਦੇ ਗਲੋਬਲ ਦਬਦਬੇ ਦਾ ਨਵਾਂ ਪ੍ਰਤੀਕ ਬਣ ਕੇ ਉੱਭਰੀ ਹੈ।
What's Your Reaction?
