ਮੈਲਬੌਰਨ ’ਚ ਭਿਆਨਕ ਸੜਕ ਹਾਦਸੇ ਨੇ ਉਜਾੜਿਆ ਪਰਿਵਾਰ: ਨੂੰਹ ਤੇ ਸੱਸ ਦੀ ਦਰਦਨਾਕ ਮੌਤ; ਦੋ ਮਾਸੂਮ ਬੱਚਿਆਂ ਦੇ ਸਿਰੋਂ ਉੱਠਿਆ ਮਾਂ ਤੇ ਦਾਦੀ ਦਾ ਸਾਇਆ
ਮੈਲਬੌਰਨ ਦੇ ਪੱਛਮੀ ਉਪ-ਨਗਰ ਪੁਆਇੰਟ ਕੁੱਕ (Point Cook) ਵਿਖੇ ਵਾਪਰੇ ਇੱਕ ਭਿਆਨਕ ਸੜਕ ਹਾਦਸੇ ਵਿੱਚ ਭਾਰਤੀ ਮੂਲ ਦੇ ਪਰਿਵਾਰ ਦੀਆਂ ਦੋ ਔਰਤਾਂ—33 ਸਾਲਾ ਨੇਹਾ ਬੋਮਾਲੀ ਅਤੇ ਉਸ ਦੀ 67 ਸਾਲਾ ਸੱਸ ਰਮਾ ਦੇਵੀ—ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਉਨ੍ਹਾਂ ਦੀ ਟੋਇਟਾ ਕੋਰੋਲਾ ਕਾਰ ਦੀ ਇੱਕ ਪੋਰਸ਼ੇ (Porsche) ਕਾਰ ਨਾਲ ਜ਼ਬਰਦਸਤ ਟੱਕਰ ਹੋ ਗਈ। ਰਮਾ ਦੇਵੀ ਹਾਲ ਹੀ ਵਿੱਚ ਆਪਣੇ ਪੋਤੇ-ਪੋਤੀਆਂ ਨੂੰ ਮਿਲਣ ਲਈ ਭਾਰਤ ਤੋਂ ਆਸਟ੍ਰੇਲੀਆ ਆਈ ਸੀ। ਇਸ ਹਿਰਦੇ-ਵੇਧਕ ਘਟਨਾ ਮਗਰੋਂ ਨੇਹਾ ਦੇ ਪਤੀ ਵਰੁਣ ਗੁੰਨਾ ’ਤੇ ਆਪਣੇ ਸਾਢੇ ਤਿੰਨ ਸਾਲ ਦੇ ਪੁੱਤਰ ਅਤੇ ਮਹਿਜ਼ ਇੱਕ ਸਾਲ ਦੀ ਧੀ ਦੀ ਇਕੱਲਿਆਂ ਪਰਵਰਿਸ਼ ਕਰਨ ਅਤੇ ਬਜ਼ੁਰਗ ਪਿਤਾ ਨੂੰ ਸੰਭਾਲਣ ਦਾ ਦੁੱਖਾਂ ਭਰਿਆ ਪਹਾੜ ਟੁੱਟ ਪਿਆ ਹੈ।
ਆਸਟ੍ਰੇਲੀਆ ਦੇ ਸ਼ਹਿਰ ਮੈਲਬੌਰਨ ਦੇ ਪੱਛਮੀ ਖੇਤਰ ਵਿੱਚ ਵਾਪਰੇ ਇੱਕ ਦਿਲ ਕੰਬਾਊ ਸੜਕ ਹਾਦਸੇ ਨੇ ਇੱਕ ਹੱਸਦੇ-ਵੱਸਦੇ ਭਾਰਤੀ ਪਰਿਵਾਰ ਦੀਆਂ ਖ਼ੁਸ਼ੀਆਂ ਪਲ ਭਰ ਵਿੱਚ ਖ਼ਾਕ ਕਰ ਦਿੱਤੀਆਂ। ਪੁਆਇੰਟ ਕੁੱਕ ਇਲਾਕੇ ਦੇ ਬ੍ਰਾਡਵਾਕ ਬੁਲੇਵਾਰਡ ਅਤੇ ਇਨਿਸਫੇਲ ਡਰਾਈਵ ਦੇ ਚੌਰਾਹੇ ’ਤੇ ਬੁੱਧਵਾਰ ਰਾਤ ਕਰੀਬ 9:40 ਵਜੇ ਦੋ ਕਾਰਾਂ ਵਿਚਾਲੇ ਹੋਈ ਭਿਆਨਕ ਟੱਕਰ ਵਿੱਚ ਦੋ ਔਰਤਾਂ ਦੀ ਥਾਂ ’ਤੇ ਹੀ ਜਾਨ ਚਲੀ ਗਈ।
ਮ੍ਰਿਤਕਾਂ ਦੀ ਪਛਾਣ 33 ਸਾਲਾ ਨੇਹਾ ਬੋਮਾਲੀ ਅਤੇ ਉਸ ਦੀ 67 ਸਾਲਾ ਸੱਸ ਰਮਾ ਦੇਵੀ ਵਜੋਂ ਹੋਈ ਹੈ। ਹਾਦਸੇ ਸਮੇਂ ਨੇਹਾ ਆਪਣੀ ਟੋਇਟਾ ਕੋਰੋਲਾ ਕਾਰ ਚਲਾ ਰਹੀ ਸੀ, ਜਿਸ ਦੌਰਾਨ ਇੱਕ ਤੇਜ਼ ਰਫ਼ਤਾਰ ਪੋਰਸ਼ੇ ਗੱਡੀ ਨੇ ਉਨ੍ਹਾਂ ਦੀ ਕਾਰ ਨੂੰ ਜ਼ੋਰਦਾਰ ਟੱਕਰ ਮਾਰ ਦਿੱਤੀ। ਟੱਕਰ ਇੰਨੀ ਖ਼ਤਰਨਾਕ ਸੀ ਕਿ ਦੋਵਾਂ ਔਰਤਾਂ ਨੇ ਘਟਨਾ ਸਥਾਨ ’ਤੇ ਹੀ ਦਮ ਤੋੜ ਦਿੱਤਾ।
ਇਸ ਦਰਦਨਾਕ ਹਾਦਸੇ ਨੇ ਨੇਹਾ ਦੇ ਪਤੀ ਵਰੁਣ ਗੁੰਨਾ ਦੀ ਜ਼ਿੰਦਗੀ ਵਿੱਚ ਅਜਿਹਾ ਖ਼ਲਾਅ ਪੈਦਾ ਕਰ ਦਿੱਤਾ ਹੈ ਜਿਸ ਦੀ ਭਰਪਾਈ ਕਦੇ ਨਹੀਂ ਹੋ ਸਕਦੀ। ਵਰੁਣ ਨੇ ਭਾਵੁਕ ਹੁੰਦਿਆਂ ਦੱਸਿਆ ਕਿ ਨੇਹਾ ਉਨ੍ਹਾਂ ਦੇ ਘਰ ਦੀ ਰੌਣਕ ਅਤੇ ਹਰ ਖ਼ੁਸ਼ੀ ਦੀ ਵਜ੍ਹਾ ਸੀ। ਉਨ੍ਹਾਂ ਨੇ ਹਾਲ ਹੀ ਵਿੱਚ ਆਪਣੀ ਇੱਕ ਸਾਲ ਦੀ ਮਾਸੂਮ ਧੀ ਵਿਵਾਨਵੀ ਦਾ ਪਹਿਲਾ ਜਨਮਦਿਨ ਮਨਾਇਆ ਸੀ, ਜਦਕਿ ਉਨ੍ਹਾਂ ਦਾ ਵੱਡਾ ਬੇਟਾ ਹਾਰਵ ਹਾਲੇ ਮਹਿਜ਼ ਸਾਢੇ ਤਿੰਨ ਸਾਲ ਦਾ ਹੈ। ਹਾਦਸੇ ਵਿੱਚ ਜਾਨ ਗੁਆਉਣ ਵਾਲੀ ਰਮਾ ਦੇਵੀ ਆਪਣੇ ਪੋਤੇ-ਪੋਤੀਆਂ ਨੂੰ ਪਿਆਰ-ਦੁਲਾਰ ਦੇਣ ਲਈ ਕੁਝ ਸਮਾਂ ਪਹਿਲਾਂ ਹੀ ਭਾਰਤ ਤੋਂ ਸੈਲਾਨੀ ਵੀਜ਼ੇ ’ਤੇ ਮੈਲਬੌਰਨ ਪਹੁੰਚੀ ਸੀ।
ਵਰੁਣ ਦੇ 75 ਸਾਲਾ ਬਜ਼ੁਰਗ ਪਿਤਾ ਤੁਲਸੀ ਪ੍ਰਸਾਦ ਨੇ ਇਸ ਹਾਦਸੇ ਵਿੱਚ ਆਪਣਾ ਉਮਰ ਭਰ ਦਾ ਜੀਵਨ ਸਾਥੀ ਗੁਆ ਦਿੱਤਾ ਹੈ। ਮਾਸੂਮ ਬੱਚਿਆਂ ਦੇ ਸਿਰੋਂ ਇੱਕੋ ਪਲ ਵਿੱਚ ਮਾਂ ਅਤੇ ਦਾਦੀ ਦੋਵਾਂ ਦਾ ਨਿੱਘ ਹਮੇਸ਼ਾ ਲਈ ਖੁੱਸ ਗਿਆ। ਸਥਾਨਕ ਭਾਈਚਾਰਾ ਇਸ ਦੁਖਦਾਈ ਘੜੀ ਵਿੱਚ ਪੀੜਤ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟ ਕਰ ਰਿਹਾ ਹੈ ਅਤੇ ਪਰਿਵਾਰ ਦੀ ਮਦਦ ਲਈ ਵਿੱਤੀ ਤੇ ਸਮਾਜਿਕ ਪੱਧਰ ’ਤੇ ਯਤਨ ਸ਼ੁਰੂ ਕੀਤੇ ਗਏ ਹਨ ਤਾਂ ਜੋ ਦੋ ਛੋਟੇ ਬੱਚਿਆਂ ਦੇ ਪਾਲਣ-ਪੋਸ਼ਣ ਵਿੱਚ ਸਹਾਰਾ ਲਗਾਇਆ ਜਾ ਸਕੇ। ਵਿਕਟੋਰੀਆ ਪੁਲੀਸ ਵੱਲੋਂ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
What's Your Reaction?
