ਯੂਏਈ ਦਾ ਗੋਲਡਨ ਵੀਜ਼ਾ: ਕਿਵੇਂ ਮਿਲਦਾ ਅਤੇ ਕੀ ਹਨ ਫਾਇਦੇ?
ਯੂਏਈ ਨੇ ਨਵਾਂ ਗੋਲਡਨ ਵੀਜ਼ਾ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ, ਜਿਸ ਨਾਲ ਭਾਰਤੀਆਂ ਸਮੇਤ ਯੋਗ ਵਿਅਕਤੀ 23.30 ਲੱਖ ਰੁਪਏ ਦੀ ਫੀਸ ਅਦਾ ਕਰਕੇ ਜੀਵਨ ਭਰ ਦੀ ਰੈਜ਼ੀਡੈਂਸੀ ਪ੍ਰਾਪਤ ਕਰ ਸਕਦੇ ਹਨ। ਇਸ ਵਿੱਚ ਨਿਵੇਸ਼ਕਾਂ, ਸਿਹਤ ਕਰਮਚਾਰੀਆਂ, ਸਿੱਖਿਅਕਾਂ, ਅਤੇ ਡਿਜੀਟਲ ਸਮੱਗਰੀ ਨਿਰਮਾਤਾਵਾਂ ਸਮੇਤ ਕਈ ਪੇਸ਼ੇਵਰ ਸ਼ਾਮਲ ਹਨ। ਇਹ ਪ੍ਰੋਗਰਾਮ ਟੈਕਸ ਲਾਭ ਅਤੇ ਪਰਿਵਾਰਕ ਸਪਾਂਸਰਸ਼ਿਪ ਵਰਗੇ ਫਾਇਦੇ ਦਿੰਦਾ ਹੈ, ਅਤੇ ਅਰਜ਼ੀ ਪ੍ਰਕਿਰਿਆ ਨੂੰ VFS ਗਲੋਬਲ ਸੰਭਾਲਦਾ ਹੈ।
ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਨੇ ਆਪਣੇ ਪੁਰਾਣੇ ਨਿਵੇਸ਼-ਆਧਾਰਿਤ ਰੈਜ਼ੀਡੈਂਸੀ ਮਾਡਲ ਵਿੱਚ ਬਦਲਾਅ ਕਰਕੇ ਨਵਾਂ ਗੋਲਡਨ ਵੀਜ਼ਾ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ। ਇਹ ਗੋਲਡਨ ਵੀਜ਼ਾ ਪ੍ਰੋਗਰਾਮ ਭਾਰਤੀਆਂ ਲਈ ਯੂਏਈ ਵਿੱਚ ਲੰਬੇ ਸਮੇਂ ਦੀ ਰੈਜ਼ੀਡੈਂਸੀ ਦਾ ਮੌਕਾ ਦਿੰਦਾ ਹੈ। ਹੁਣ ਯੋਗ ਭਾਰਤੀ 1,00,000 ਦਰਹਾਮ (ਕਰੀਬ 23.30 ਲੱਖ ਰੁਪਏ) ਦੀ ਇੱਕ ਵਾਰ ਦੀ ਫੀਸ ਅਦਾ ਕਰਕੇ ਜੀਵਨ ਭਰ ਦੀ ਰੈਜ਼ੀਡੈਂਸੀ ਪ੍ਰਾਪਤ ਕਰ ਸਕਦੇ ਹਨ। ਇਸ ਨਵੇਂ ਪ੍ਰੋਗਰਾਮ ਵਿੱਚ ਜਾਇਦਾਦ ਜਾਂ ਕਾਰੋਬਾਰ ਵਿੱਚ ਨਿਵੇਸ਼ ਕਰਨ ਦੀ ਲੋੜ ਨਹੀਂ ਹੈ।
ਗੋਲਡਨ ਵੀਜ਼ਾ ਲਈ ਕੌਣ ਯੋਗ ਹੈ?
ਗੋਲਡਨ ਵੀਜ਼ਾ ਪ੍ਰੋਗਰਾਮ ਹੁਣ ਸਿਰਫ਼ ਨਿਵੇਸ਼ਕਾਂ ਅਤੇ ਉੱਦਮੀਆਂ ਤੱਕ ਸੀਮਤ ਨਹੀਂ ਹੈ, ਸਗੋਂ ਵੱਖ-ਵੱਖ ਪੇਸ਼ੇਵਰਾਂ ਲਈ ਵੀ ਖੁੱਲ੍ਹਾ ਹੈ। ਇਸ ਨਵੀਂ ਪ੍ਰਣਾਲੀ ਅਧੀਨ, ਬਿਨੈਕਾਰਾਂ ਨੂੰ ਉਨ੍ਹਾਂ ਦੇ ਪੇਸ਼ੇਵਰ ਪਿਛੋਕੜ, ਸਮਾਜਿਕ ਯੋਗਦਾਨ, ਜਾਂ ਯੂਏਈ ਦੇ ਖੇਤਰਾਂ ਜਿਵੇਂ ਸੱਭਿਆਚਾਰ, ਵਪਾਰ, ਵਿਗਿਆਨ, ਸਟਾਰਟਅੱਪਸ, ਜਾਂ ਵਿੱਤ ਵਿੱਚ ਸੰਭਾਵੀ ਲਾਭਾਂ ਦੇ ਆਧਾਰ ’ਤੇ ਨਾਮਜ਼ਦ ਕੀਤਾ ਜਾ ਸਕਦਾ ਹੈ। ਯੋਗ ਵਿਅਕਤੀਆਂ ਵਿੱਚ ਸਿਹਤ ਕਰਮਚਾਰੀ, ਸਿੱਖਿਅਕ, ਡਿਜੀਟਲ ਸਮੱਗਰੀ ਨਿਰਮਾਤਾ, ਵਿਗਿਆਨੀ, ਖੋਜਾਰਥੀ, ਕਾਰਪੋਰੇਟ ਕਾਰਜਕਾਰੀ, ਅਤੇ ਸਮੁੰਦਰੀ ਅਤੇ ਲੌਜਿਸਟਿਕਸ ਪੇਸ਼ੇਵਰ ਸ਼ਾਮਲ ਹਨ।
ਬਿਨੈਕਾਰਾਂ ਨੂੰ ਸਖ਼ਤ ਪਿਛੋਕੜ ਜਾਂਚ ਪਾਸ ਕਰਨੀ ਪਵੇਗੀ, ਜਿਸ ਵਿੱਚ ਮਨੀ ਲਾਂਡਰਿੰਗ ਵਿਰੋਧੀ ਅਤੇ ਅਪਰਾਧਕ ਰਿਕਾਰਡ ਦੀ ਜਾਂਚ ਸ਼ਾਮਲ ਹੈ। ਭਾਰਤ ਵਿੱਚ ਅਰਜ਼ੀ ਪ੍ਰਕਿਰਿਆ ਨੂੰ ਰਿਆਧ ਗਰੁੱਪ, VFS ਗਲੋਬਲ, ਅਤੇ ਵਨ ਵਾਸਕੋ ਦੇ ਸਹਿਯੋਗ ਨਾਲ ਸੰਭਾਲਿਆ ਜਾ ਰਿਹਾ ਹੈ। ਅਰਜ਼ੀਆਂ ਭੌਤਿਕ ਕੇਂਦਰਾਂ, ਔਨਲਾਈਨ ਪਲੈਟਫਾਰਮਾਂ, ਜਾਂ ਕਾਲ ਸੈਂਟਰਾਂ ਰਾਹੀਂ ਜਮ੍ਹਾਂ ਕਰਵਾਈਆਂ ਜਾ ਸਕਦੀਆਂ ਹਨ। ਉਮੀਦਵਾਰਾਂ ਨੂੰ ਯੂਏਈ ਦੀ ਯਾਤਰਾ ਕੀਤੇ ਬਿਨਾਂ ਪੂਰਵ-ਪ੍ਰਵਾਨਗੀ ਮਿਲ ਸਕਦੀ ਹੈ।
ਗੋਲਡਨ ਵੀਜ਼ਾ ਦੇ ਫਾਇਦੇ
ਇਹ ਨਵਾਂ ਗੋਲਡਨ ਵੀਜ਼ਾ ਪ੍ਰੋਗਰਾਮ ਪੁਰਾਣੇ ਮਾਡਲ ਨਾਲੋਂ ਕਈ ਫਾਇਦੇ ਦਿੰਦਾ ਹੈ। ਪਹਿਲਾਂ ਰੀਅਲ ਅਸਟੇਟ ਵਿੱਚ ਘੱਟੋ-ਘੱਟ 20 ਲੱਖ ਦਰਹਾਮ (ਕਰੀਬ 4.66 ਕਰੋੜ ਰੁਪਏ) ਦੇ ਨਿਵੇਸ਼ ਦੀ ਲੋੜ ਸੀ, ਪਰ ਹੁਣ ਇਸ ਦੀ ਜ਼ਰੂਰਤ ਨਹੀਂ। ਇਸ ਨਾਲ ਵੱਡਾ ਵਿੱਤੀ ਬਚਾਅ ਹੋਇਆ ਹੈ। ਨਵੇਂ ਪ੍ਰੋਗਰਾਮ ਵਿੱਚ ਜੀਵਨ ਭਰ ਦੀ ਰੈਜ਼ੀਡੈਂਸੀ, ਕਿਸੇ ਵੀ ਪੇਸ਼ੇਵਰ ਜਾਂ ਵਪਾਰਕ ਖੇਤਰ ਵਿੱਚ ਕੰਮ ਕਰਨ, ਰਹਿਣ ਜਾਂ ਨਿਵੇਸ਼ ਕਰਨ ਦੀ ਆਜ਼ਾਦੀ, ਪਰਿਵਾਰਕ ਮੈਂਬਰਾਂ ਅਤੇ ਘਰੇਲੂ ਸਟਾਫ ਦੀ ਸਪਾਂਸਰਸ਼ਿਪ, ਘੱਟੋ-ਘੱਟ ਸੰਪਤੀ ਸੀਮਾਬਣਾਈ ਰੱਖਣ ਦੀ ਕੋਈ ਲੋੜ ਨਹੀਂ, ਅਤੇ ਟੈਕਸ ਲਾਭ ਜਿਵੇਂ ਕਿ ਜ਼ੀਰੋ ਨਿੱਜੀ ਆਮਦਨ ਟੈਕਸ, ਪੂੰਜੀ ਲਾਭ ਟੈਕਸ, ਅਤੇ ਵਿਰਾਸਤ ਟੈਕਸ ਸ਼ਾਮਲ ਹਨ।
ਇਹ ਪਹਿਲਕਦਮੀ 2022 ਵਿੱਚ ਸਹੀਬੰਦ ਕੀਤੇ ਵਿਆਪਕ ਆਰਥਿਕ ਭਾਈਵਾਲੀ ਸਮਝੌਤੇ (CEPA) ਦਾ ਹਿੱਸਾ ਹੈ। ਪਹਿਲੇ ਤਿੰਨ ਮਹੀਨਿਆਂ ਵਿੱਚ 5,000 ਤੋਂ ਵੱਧ ਭਾਰਤੀ ਨਾਗਰਿਕ ਵੱਲੋਂ ਅਰਜ਼ੀ ਦੇਣ ਦੀ ਉਮੀਦ ਹੈ।
ਕੀ ਸਿਰਫ਼ ਪੈਸੇ ਨਾਲ ਗੋਲਡਨ ਵੀਜ਼ਾ ਮਿਲ ਸਕਦਾ ਹੈ?
ਗੋਲਡਨ ਵੀਜ਼ਾ ਦੀ ਨਵੀਂ ਨਾਮਜ਼ਦਗੀ-ਆਧਾਰਿਤ ਪ੍ਰਕਿਰਿਆ ਨੇ ਬਹੁਤ ਧਿਆਨ ਖਿੱਚਿਆ ਹੈ, ਪਰ ਇਹ ਸਿਰਫ਼ ਫੀਸ ਦਾ ਭੁਗਤਾਨ ਕਰਨ ਜਿੰਨੀ ਸੌਖੀ ਨਹੀਂ ਹੈ। ਯੂਏਈ ਸਰਕਾਰ ਦੀ ਅਧਿਕਾਰਤ ਵੈੱਬਸਾਈਟ ਅਨੁਸਾਰ, ਸਿਰਫ਼ ਪੈਸੇ ਵਾਲਾ ਵਿਅਕਤੀ ਰੈਜ਼ੀਡੈਂਸੀ ਲਈ ਯੋਗ ਨਹੀਂ ਹੁੰਦਾ। ਭਾਰਤੀ ਨਿਵੇਸ਼ਕਾਂ ਨੂੰ ਜਾਂ ਤਾਂ 20 ਲੱਖ ਦਰਹਾਮ ਦਾ ਯੂਏਈ-ਪ੍ਰਵਾਨਿਤ ਫੰਡ ਵਿੱਚ ਨਿਵੇਸ਼ ਕਰਨਾ ਹੋਵੇਗਾ ਜਾਂ ਇਸੇ ਕੀਮਤ ਦੀ ਰੀਅਲ ਅਸਟੇਟ ਦੀ ਮਾਲਕੀ ਦਾ ਸਬੂਤ ਦੇਣਾ ਹੋਵੇਗਾ। ਨਾਲ ਹੀ, ਮੈਡੀਕਲ ਬੀਮਾ ਅਤੇ ਕਰਜ਼ੇ ਤੋਂ ਮੁਕਤ ਪੂੰਜੀ ਦਾ ਸਬੂਤ ਵੀ ਜਮ੍ਹਾਂ ਕਰਾਉਣਾ ਜ਼ਰੂਰੀ ਹੈ।
What's Your Reaction?
