ਫ਼ਰਜ਼ੀ ਸ਼ਨਾਖ਼ਤੀ ਕਾਰਡ ਤੇ ਸ਼ੱਕੀ ਡਰਾਈਵਿੰਗ ਨੇ ਫਸਾਇਆ: ਕੈਨੇਡਾ ’ਚ ਇੰਝ ਮੁੱਕਿਆ ਗੈਂਗਸਟਰ ਅੰਮ੍ਰਿਤਪਾਲ ਬਾਠ ਦਾ ਲੁਕਣਮੀਚੀ ਦਾ ਦੌਰ
ਪੰਜਾਬ ਵਿੱਚ ਕਤਲ, ਇਰਾਦਾ ਕਤਲ, ਫਿਰੌਤੀ ਅਤੇ ਨਸ਼ਾ ਤਸਕਰੀ ਸਮੇਤ ਕਰੀਬ 20 ਸੰਗੀਨ ਮਾਮਲਿਆਂ ਵਿੱਚ ਲੋੜੀਂਦੇ ‘ਕੈਟਾਗਰੀ-ਏ’ ਦੇ ਗੈਂਗਸਟਰ ਅੰਮ੍ਰਿਤਪਾਲ ਸਿੰਘ ਬਾਠ ਦੀ ਕੈਨੇਡਾ ਵਿੱਚ ਗ੍ਰਿਫ਼ਤਾਰੀ ਪਿੱਛੇ ਇੱਕ ਹੈਰਾਨੀਜਨਕ ਘਟਨਾਕ੍ਰਮ ਸਾਹਮਣੇ ਆਇਆ ਹੈ। ਉਹ ਕਿਸੇ ਵੱਡੇ ਖੁਫ਼ੀਆ ਅਪਰੇਸ਼ਨ ਕਾਰਨ ਨਹੀਂ, ਸਗੋਂ ਬ੍ਰਿਟਿਸ਼ ਕੋਲੰਬੀਆ ਦੀ ਸਰੀ ਪੁਲੀਸ ਵੱਲੋਂ ਕੀਤੀ ਗਈ ਇੱਕ ਆਮ ਟ੍ਰੈਫ਼ਿਕ ਚੈਕਿੰਗ ਦੌਰਾਨ ਸੰਜੋਗਵਸ਼ ਫੜਿਆ ਗਿਆ। 8 ਅਕਤੂਬਰ ਦੀ ਸ਼ਾਮ ਨੂੰ ਸਰੀ ਦੇ ਵ੍ਹੀਲੀ ਇਲਾਕੇ ਵਿੱਚ ਬੇਤਰਤੀਬੇ ਢੰਗ ਨਾਲ ਚੱਲ ਰਹੀ ਇੱਕ ਕਾਰ ਨੂੰ ਰੋਕਣ ਮਗਰੋਂ, ਮੂਹਰਲੀ ਸੀਟ ’ਤੇ ਬੈਠੇ ਬਾਠ ਨੇ 'ਹਰਪ੍ਰੀਤ ਸਿੰਘ' ਦੇ ਨਾਂ ਦਾ ਜਾਅਲੀ ਸ਼ਨਾਖ਼ਤੀ ਕਾਰਡ ਪੇਸ਼ ਕੀਤਾ। ਪੁਲੀਸ ਅਧਿਕਾਰੀ ਨੂੰ ਸ਼ੱਕ ਪੈਣ ’ਤੇ ਜਦੋਂ ਵੇਰਵਿਆਂ ਦੀ ਜਾਂਚ ਕੌਮਾਂਤਰੀ ਡੇਟਾਬੇਸ ਵਿੱਚ ਕੀਤੀ ਗਈ ਤਾਂ ਉਸ ਦੇ ਇੰਟਰਪੋਲ ਦੇ ਰੈੱਡ ਕਾਰਨਰ ਨੋਟਿਸ ਵਾਲਾ ਭਗੌੜਾ ਹੋਣ ਦਾ ਪਰਦਾਫ਼ਾਸ਼ ਹੋ ਗਿਆ। ਉਸ ਨੂੰ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ (CBSA) ਹਵਾਲੇ ਕਰ ਦਿੱਤਾ ਗਿਆ ਹੈ ਅਤੇ ਪੰਜਾਬ ਪੁਲੀਸ ਨੇ ਉਸ ਦੀ ਭਾਰਤ ਹਵਾਲਗੀ ਲਈ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਪੰਜਾਬ ਪੁਲੀਸ ਲਈ ਸਿਰਦਰਦੀ ਬਣੇ ਰਹੇ ਮੀਆਂਪੁਰ (ਤਰਨ ਤਾਰਨ) ਦੇ ਨਾਮੀ ਗੈਂਗਸਟਰ ਅੰਮ੍ਰਿਤਪਾਲ ਸਿੰਘ ਬਾਠ ਦੀ ਕੈਨੇਡਾ ਵਿੱਚ ਗ੍ਰਿਫ਼ਤਾਰੀ ਦੀ ਪੁਸ਼ਟੀ ਇੰਟਰਪੋਲ ਵੱਲੋਂ ਕਰ ਦਿੱਤੀ ਗਈ ਹੈ। ਕੈਨੇਡੀਅਨ ਮੀਡੀਆ ਰਿਪੋਰਟਾਂ ਅਨੁਸਾਰ, ਇਹ ਖ਼ਤਰਨਾਕ ਅਪਰਾਧੀ ਕਿਸੇ ਵਿਸ਼ੇਸ਼ ਯੋਜਨਾ ਜਾਂ ਛਾਪੇਮਾਰੀ ਕਾਰਨ ਨਹੀਂ, ਸਗੋਂ ਸਥਾਨਕ ਪੁਲੀਸ ਦੀ ਇੱਕ ਆਮ ਨਾਕਾਬੰਦੀ ਅਤੇ ਚੌਕਸੀ ਕਾਰਨ ਕਾਨੂੰਨ ਦੇ ਸ਼ਿਕੰਜੇ ਵਿੱਚ ਫਸਿਆ।
ਵੇਰਵਿਆਂ ਮੁਤਾਬਕ 8 ਅਕਤੂਬਰ ਦੀ ਸ਼ਾਮ ਨੂੰ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੇ ਸ਼ਹਿਰ ਸਰੀ ਦੇ ਵ੍ਹੀਲੀ (Whalley) ਇਲਾਕੇ ਵਿੱਚ ਗਸ਼ਤ ਕਰ ਰਹੀ ਪੁਲੀਸ ਟੀਮ ਨੇ ਇੱਕ ਸ਼ੱਕੀ ਢੰਗ ਨਾਲ ਚੱਲ ਰਹੀ ਕਾਰ ਨੂੰ ਰੋਕਿਆ ਸੀ। ਕਾਰ ਦੀ ਮੂਹਰਲੀ ਸੀਟ 'ਤੇ ਸਵਾਰ ਅੰਮ੍ਰਿਤਪਾਲ ਬਾਠ ਨੇ ਪੁਲੀਸ ਤੋਂ ਆਪਣੀ ਪਛਾਣ ਲੁਕਾਉਣ ਲਈ ਆਪਣਾ ਨਾਂ ਹਰਪ੍ਰੀਤ ਸਿੰਘ ਦੱਸਿਆ ਅਤੇ ਉਸੇ ਨਾਂ 'ਤੇ ਬਣਿਆ ਇੱਕ ਆਈਡੀ ਕਾਰਡ ਜਾਂਚ ਅਧਿਕਾਰੀ ਨੂੰ ਸੌਂਪਿਆ। ਸਰੀ ਪੁਲੀਸ ਦੇ ਬੁਲਾਰੇ ਇਆਨ ਮੈਕਡੋਨਲਡ ਅਨੁਸਾਰ ਦਸਤਾਵੇਜ਼ ਦੇਖਣ ਤੋਂ ਹੀ ਨਕਲੀ ਪ੍ਰਤੀਤ ਹੋ ਰਿਹਾ ਸੀ, ਜਿਸ ਕਾਰਨ ਮੌਕੇ 'ਤੇ ਮੌਜੂਦ ਪੁਲੀਸ ਮੁਲਾਜ਼ਮਾਂ ਦਾ ਮੱਥਾ ਠਣਕਿਆ ਅਤੇ ਉਨ੍ਹਾਂ ਨੇ ਕਾਰ ਸਵਾਰਾਂ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ।
ਜਦੋਂ ਉਸ ਵਿਅਕਤੀ ਦਾ ਬਾਇਓਮੈਟ੍ਰਿਕ ਅਤੇ ਹੋਰ ਰਿਕਾਰਡ ਕੌਮਾਂਤਰੀ ਪੁਲੀਸ ਡੇਟਾਬੇਸ ਵਿੱਚ ਖੰਗਾਲਿਆ ਗਿਆ ਤਾਂ ਸਾਹਮਣੇ ਆਇਆ ਕਿ ਉਹ ਭਾਰਤ ਦਾ ਬਦਨਾਮ ਭਗੌੜਾ ਅੰਮ੍ਰਿਤਪਾਲ ਸਿੰਘ ਬਾਠ ਹੈ, ਜਿਸ ਵਿਰੁੱਧ ਇੰਟਰਪੋਲ ਵੱਲੋਂ ਰੈੱਡ ਕਾਰਨਰ ਨੋਟਿਸ ਜਾਰੀ ਕੀਤਾ ਹੋਇਆ ਸੀ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਕੈਨੇਡੀਅਨ ਸੁਰੱਖਿਆ ਏਜੰਸੀਆਂ ਨੂੰ ਉਸ ਦੇ ਮੁਲਕ ਵਿੱਚ ਦਾਖ਼ਲ ਹੋਣ ਅਤੇ ਉੱਥੇ ਰਹਿਣ ਦੀ ਭਿਣਕ ਤੱਕ ਨਹੀਂ ਸੀ।
ਪੁਲੀਸ ਨੇ ਉਸ ਨੂੰ ਮੌਕੇ 'ਤੇ ਹੀ ਹਿਰਾਸਤ ਵਿੱਚ ਲੈ ਕੇ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ (CBSA) ਹਵਾਲੇ ਕਰ ਦਿੱਤਾ, ਜਿੱਥੇ ਉਹ ਫਿਲਹਾਲ ਇਮੀਗ੍ਰੇਸ਼ਨ ਹਿਰਾਸਤ ਅਧੀਨ ਬੰਦ ਹੈ। ਤਰਨ ਤਾਰਨ ਦੇ ਪਿੰਡ ਮੀਆਂਪੁਰ ਦਾ ਵਾਸੀ ਬਾਠ ਸਰਪੰਚ ਸੋਨੂੰ ਚੀਮਾ ਕਤਲ ਕਾਂਡ ਸਮੇਤ ਕਤਲ, ਇਰਾਦਾ ਕਤਲ, ਜਬਰਨ ਵਸੂਲੀ, ਡਰੱਗ ਤਸਕਰੀ ਅਤੇ ਯੂਏਪੀਏ ਅਧੀਨ ਦਰਜ ਦੋ ਦਰਜਨ ਮਾਮਲਿਆਂ ਵਿੱਚ ਲੋੜੀਂਦਾ ਸੀ। ਪੰਜਾਬ ਪੁਲੀਸ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਵਿਦੇਸ਼ ਮੰਤਰਾਲੇ ਅਤੇ ਕੇਂਦਰੀ ਏਜੰਸੀਆਂ ਰਾਹੀਂ ਉਸ ਦੀ ਡਿਪੋਰਟੇਸ਼ਨ ਜਾਂ ਐਕਸਟਰਾਡੀਸ਼ਨ ਦੀ ਪ੍ਰਕਿਰਿਆ ਤੇਜ਼ ਕਰ ਦਿੱਤੀ ਗਈ ਹੈ ਤਾਂ ਜੋ ਉਸ ਨੂੰ ਛੇਤੀ ਭਾਰਤ ਲਿਆ ਕੇ ਅਦਾਲਤੀ ਕਟਹਿਰੇ ਵਿੱਚ ਖੜ੍ਹਾ ਕੀਤਾ ਜਾ ਸਕੇ।
What's Your Reaction?
