ਏਅਰ ਇੰਡੀਆ ਵਿੱਚ ਤਜਰਬੇਕਾਰ ਪਾਇਲਟਾਂ ਦੇ ਅਸਤੀਫ਼ਿਆਂ ਕਾਰਨ ਉਡਾਣ ਸੁਰੱਖਿਆ ’ਤੇ ਖ਼ਤਰਾ; ਪਾਇਲਟ ਯੂਨੀਅਨ ਨੇ ਟਾਟਾ ਲੀਡਰਸ਼ਿਪ ਨੂੰ ਲਿਖਿਆ ਪੱਤਰ
ਏਅਰਲਾਈਨ ਪਾਇਲਟਸ ਐਸੋਸੀਏਸ਼ਨ ਆਫ਼ ਇੰਡੀਆ (ALPA India) ਨੇ ਟਾਟਾ ਗਰੁੱਪ ਦੀ ਅਗਵਾਈ ਨੂੰ ਪੱਤਰ ਲਿਖ ਕੇ ਚਿਤਾਵਨੀ ਦਿੱਤੀ ਹੈ ਕਿ ਏਅਰ ਇੰਡੀਆ ਅਤੇ ਏਅਰ ਇੰਡੀਆ ਐਕਸਪ੍ਰੈੱਸ ਵਿੱਚੋਂ ਤਜਰਬੇਕਾਰ ਪਾਇਲਟਾਂ ਦੇ ਲਗਾਤਾਰ ਅਸਤੀਫ਼ਿਆਂ ਕਾਰਨ ਉਡਾਣ ਸੁਰੱਖਿਆ ਲਈ ਗੰਭੀਰ ਖ਼ਤਰਾ ਪੈਦਾ ਹੋ ਸਕਦਾ ਹੈ। ਐਸੋਸੀਏਸ਼ਨ ਨੇ ਪਾਇਲਟਾਂ ਦੀ ਥਕਾਵਟ (ਫਟੀਗ), ਰੋਸਟਰ ਪ੍ਰਣਾਲੀ ਦੀਆਂ ਖ਼ਾਮੀਆਂ ਅਤੇ ਲਗਾਤਾਰ ਫਲੀਟ ਤਬਦੀਲੀਆਂ ਵੱਲ ਧਿਆਨ ਦਿਵਾਉਂਦਿਆਂ ਇਸ ਮਾਮਲੇ ਦੀ ਇੱਕ ਸੁਤੰਤਰ ਸਮੀਖਿਆ ਕਰਵਾਉਣ ਅਤੇ ਪਾਇਲਟਾਂ ਦੀ ਸੰਭਾਲ ਲਈ ਠੋਸ ਨੀਤੀ ਬਣਾਉਣ ਦੀ ਮੰਗ ਕੀਤੀ ਹੈ।
ਟਾਟਾ ਸਮੂਹ ਵੱਲੋਂ ਏਅਰ ਇੰਡੀਆ ਦੇ ਕੀਤੇ ਜਾ ਰਹੇ ਵਿਸਥਾਰ ਅਤੇ ਪੁਨਰਗਠਨ ਦਰਮਿਆਨ ਤਜਰਬੇਕਾਰ ਪਾਇਲਟਾਂ ਦੇ ਵੱਡੀ ਗਿਣਤੀ ਵਿੱਚ ਨੌਕਰੀ ਛੱਡਣ ਕਾਰਨ ਹਵਾਬਾਜ਼ੀ ਸੁਰੱਖਿਆ ਨੂੰ ਲੈ ਕੇ ਗੰਭੀਰ ਚਿੰਤਾਵਾਂ ਖੜ੍ਹੀਆਂ ਹੋ ਗਈਆਂ ਹਨ। ਦੇਸ਼ ਦੀ ਪ੍ਰਮੁੱਖ ਪਾਇਲਟ ਜਥੇਬੰਦੀ ‘ਏਅਰਲਾਈਨ ਪਾਇਲਟਸ ਐਸੋਸੀਏਸ਼ਨ ਆਫ਼ ਇੰਡੀਆ’ (ALPA India) ਨੇ ਟਾਟਾ ਟਰੱਸਟ ਦੇ ਚੇਅਰਮੈਨ ਨੋਇਲ ਟਾਟਾ ਨੂੰ ਇੱਕ ਰਸਮੀ ਪੱਤਰ ਲਿਖ ਕੇ ਸੁਚੇਤ ਕੀਤਾ ਹੈ ਕਿ ਸੀਨੀਅਰ ਕਮਾਂਡਰਾਂ ਅਤੇ ਤਜਰਬੇਕਾਰ ਪਾਇਲਟਾਂ ਦੇ ਜਾਣ ਨਾਲ ਕਾਕਪਿਟ ਦੇ ਤਜਰਬੇ ਦਾ ਸੰਤੁਲਨ ਵਿਗੜ ਰਿਹਾ ਹੈ, ਜੋ ਸਿੱਧੇ ਤੌਰ ’ਤੇ ਉਡਾਣ ਸੁਰੱਖਿਆ ਲਈ ਖ਼ਤਰਾ ਬਣ ਸਕਦਾ ਹੈ।
ਐਸੋਸੀਏਸ਼ਨ ਦੇ ਪ੍ਰਧਾਨ ਕੈਪਟਨ ਸੈਮ ਥਾਮਸ ਅਨੁਸਾਰ ਪਾਇਲਟਾਂ ਦੇ ਅਸਤੀਫ਼ਿਆਂ ਦਾ ਸਭ ਤੋਂ ਵੱਧ ਅਸਰ ਏਅਰ ਇੰਡੀਆ ਐਕਸਪ੍ਰੈੱਸ ਵਿੱਚ ਦੇਖਣ ਨੂੰ ਮਿਲ ਰਿਹਾ ਹੈ। ਪਾਇਲਟਾਂ ਵਿੱਚ ਕੰਮ ਦੇ ਬੋਝ, ਅਨਿਯਮਿਤ ਰੋਸਟਰ, ਥਕਾਵਟ (ਫਟੀਗ), ਤਨਖ਼ਾਹ ਢਾਂਚੇ ਵਿੱਚ ਕਮੀਆਂ ਅਤੇ ਏਅਰਬੱਸ ਤੇ ਬੋਇੰਗ ਜਹਾਜ਼ਾਂ ਵਿਚਕਾਰ ਵਾਰ-ਵਾਰ ਫਲੀਟ ਤਬਦੀਲੀਆਂ ਕਾਰਨ ਭਾਰੀ ਬੇਚੈਨੀ ਪਾਈ ਜਾ ਰਹੀ ਹੈ। ਪੱਤਰ ਵਿੱਚ ਜ਼ੋਰ ਦੇ ਕੇ ਕਿਹਾ ਗਿਆ ਹੈ ਕਿ ਤਜਰਬੇਕਾਰ ਪਾਇਲਟ ਮਹਿਜ਼ ਕਾਗ਼ਜ਼ੀ ਅੰਕੜੇ ਨਹੀਂ ਹੁੰਦੇ, ਸਗੋਂ ਉਹ ਐਮਰਜੈਂਸੀ ਹਾਲਾਤ ਵਿੱਚ ਸਹੀ ਫ਼ੈਸਲੇ ਲੈਣ ਵਾਲੇ ਏਅਰਲਾਈਨ ਦੇ ਸਭ ਤੋਂ ਮਹੱਤਵਪੂਰਨ ਸੁਰੱਖਿਆ ਸਰਮਾਏ ਹੁੰਦੇ ਹਨ।
ਪਾਇਲਟ ਯੂਨੀਅਨ ਨੇ ਹਾਲ ਹੀ ਵਿੱਚ ਵਾਪਰੀਆਂ ਤਿੰਨ ਪ੍ਰਮੁੱਖ ਘਟਨਾਵਾਂ—ਜਿਨ੍ਹਾਂ ਵਿੱਚ ਫੂਕੇਟ ਵਿਖੇ ਬੋਇੰਗ 737 ਮੈਕਸ ਦੀ ਹਾਰਡ ਲੈਂਡਿੰਗ, ਬੈਂਗਲੁਰੂ ਵਿਖੇ ਏਅਰਬੱਸ ਏ321 ਦੀ ਟੇਲ-ਸਟ੍ਰਾਈਕ ਅਤੇ ਫੂਕੇਟ-ਦਿੱਲੀ ਉਡਾਣ ਦੌਰਾਨ ਇਨ-ਫਲਾਈਟ ਕੰਟਰੋਲ ਘਟਨਾ ਸ਼ਾਮਲ ਹੈ—ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਕਿ ਇਨ੍ਹਾਂ ਘਟਨਾਵਾਂ ਦੀ ਡੂੰਘਾਈ ਨਾਲ ਜਾਂਚ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਘੱਟੋ-ਘੱਟ ਸਰਕਾਰੀ ਨਿਯਮਾਂ ਦੀ ਪਾਲਣਾ ਕਰਨਾ ਹੀ ਸੁਰੱਖਿਆ ਦਾ ਮਾਪਦੰਡ ਨਹੀਂ ਹੋ ਸਕਦਾ, ਸਗੋਂ ਕੌਮਾਂਤਰੀ ਪੱਧਰ ਦੇ ਸੁਰੱਖਿਆ ਮਾਪਦੰਡਾਂ ਨੂੰ ਲਾਗੂ ਕਰਨਾ ਲਾਜ਼ਮੀ ਹੈ।
ਐਲਪਾ ਇੰਡੀਆ ਨੇ ਮੰਗ ਕੀਤੀ ਹੈ ਕਿ ਏਅਰ ਇੰਡੀਆ ਗਰੁੱਪ ਵਿੱਚ ਪਾਇਲਟਾਂ ਦੀ ਨੌਕਰੀ ਛੱਡਣ ਦੀ ਦਰ, ਥਕਾਵਟ ਪ੍ਰਬੰਧਨ ਪ੍ਰਣਾਲੀ (FRMS), ਟ੍ਰੇਨਿੰਗ ਦੇ ਮਿਆਰ ਅਤੇ ਸੇਵਾ ਸ਼ਰਤਾਂ ਦਾ ਇੱਕ ਨਿਰਪੱਖ ਤੇ ਸੁਤੰਤਰ ਆਡਿਟ ਕਰਵਾਇਆ ਜਾਵੇ। ਯੂਨੀਅਨ ਨੇ ਪ੍ਰਬੰਧਨ ਨੂੰ ਅਪੀਲ ਕੀਤੀ ਹੈ ਕਿ ਪਾਇਲਟਾਂ ਦੀ ਸੰਭਾਲ ਨੂੰ ਮਹਿਜ਼ ਐੱਚਆਰ ਦਾ ਮਾਮਲਾ ਨਾ ਸਮਝਿਆ ਜਾਵੇ, ਸਗੋਂ ਇਸ ਨੂੰ ਏਅਰਲਾਈਨ ਦੀ ਸਮੁੱਚੀ ਸੁਰੱਖਿਆ ਰਣਨੀਤੀ ਦਾ ਅਹਿਮ ਹਿੱਸਾ ਮੰਨ ਕੇ ਤੁਰੰਤ ਸੁਧਾਰਾਤਮਕ ਕਦਮ ਚੁੱਕੇ ਜਾਣ।
What's Your Reaction?
