ਚੰਡੀਗੜ੍ਹ ਵਿੱਚ 332 ਕਰੋੜ ਰੁਪਏ ਦੇ ਬੈਂਕ ਘੁਟਾਲੇ ਦਾ ਮਾਮਲਾ: ਈਡੀ ਵੱਲੋਂ ਜਿਊਲਰ ਗ੍ਰਿਫ਼ਤਾਰ
ਐਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਆਈਡੀਐੱਫਸੀ ਫਸਟ ਬੈਂਕ ਅਤੇ ਏਯੂ ਸਮਾਲ ਫਾਈਨਾਂਸ ਬੈਂਕ ਨਾਲ ਜੁੜੇ ਕਰੋੜਾਂ ਦੇ ਘੁਟਾਲੇ ਵਿੱਚ ਚੰਡੀਗੜ੍ਹ ਦੇ ਸਾਵਨ ਜਿਊਲਰਜ਼ ਦੇ ਭਾਈਵਾਲ ਰਾਜਨ ਸਿੰਘ ਕਟੌਦੀਆ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਐਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਦੇ ਚੰਡੀਗੜ੍ਹ ਜ਼ੋਨਲ ਦਫ਼ਤਰ ਨੇ ਆਈ ਡੀ ਐੱਫ ਸੀ ਫਸਟ ਬੈਂਕ ਅਤੇ ਏ ਯੂ ਸਮਾਲ ਫਾਈਨਾਂਸ ਬੈਂਕ ਨਾਲ ਸਬੰਧਤ ਬਹੁ-ਕਰੋੜੀ ਘੁਟਾਲੇ ਵਿੱਚ ਚੰਡੀਗੜ੍ਹ ਦੇ ਜਿਊਲਰ ਰਾਜਨ ਸਿੰਘ ਕਟੌਦੀਆ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਹ ਸੈਕਟਰ 35-ਸੀ ਦੀ ਇਨਰ ਮਾਰਕੀਟ ਵਿੱਚ ਸਥਿਤ ਸਾਵਨ ਜਿਊਲਰਜ਼ ਦਾ ਭਾਈਵਾਲ ਹੈ। ਉਸ ਨੂੰ 22 ਅਕਤੂਬਰ ਨੂੰ ਵਿਸ਼ੇਸ਼ ਅਦਾਲਤ (ਪੀ ਐੱਮ ਐੱਲ ਏ) ਵਿੱਚ ਪੇਸ਼ ਕੀਤੇ ਜਾਣ ਮਗਰੋਂ ਗ੍ਰਿਫ਼ਤਾਰ ਕੀਤਾ ਗਿਆ। ਵੀਰਵਾਰ ਨੂੰ ਪੰਚਕੂਲਾ ਦੀ ਵਿਸ਼ੇਸ਼ ਅਦਾਲਤ ਨੇ ਉਸ ਨੂੰ ਚਾਰ ਦਿਨ ਦੇ ਈ ਡੀ ਰਿਮਾਂਡ ’ਤੇ ਭੇਜ ਦਿੱਤਾ। ਇਸ ਮਾਮਲੇ ਵਿੱਚ ਹਰਿਆਣਾ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਅਤੇ ਚੰਡੀਗੜ੍ਹ ਪ੍ਰਸ਼ਾਸਨ ਦੇ 645 ਕਰੋੜ ਰੁਪਏ ਦੇ ਗਬਨ ਦਾ ਦੋਸ਼ ਹੈ।
ਈ ਡੀ ਅਨੁਸਾਰ ਸਾਵਨ ਜਿਊਲਰਜ਼ ਦੇ ਸਰਗਰਮ ਪ੍ਰਬੰਧਕੀ ਭਾਈਵਾਲ ਕਟੌਦੀਆ ਨੇ ਘੁਟਾਲੇ ਦੇ ਮੁੱਖ ਮੁਲਜ਼ਮ ਰਿਭਵ ਰਿਸ਼ੀ ਅਤੇ ਹੋਰਨਾਂ ਨਾਲ ਕਥਿਤ ਅਪਰਾਧਿਕ ਸਾਜ਼ਿਸ਼ ਰਚੀ। ਜਾਂਚ ਦੌਰਾਨ ਫਰਮ ਦੇ ਬੈਂਕ ਖਾਤੇ ਦੇ ਵਿਸ਼ਲੇਸ਼ਣ ਤੋਂ ਪਤਾ ਲੱਗਾ ਕਿ 6 ਨਵੰਬਰ 2024 ਤੋਂ 18 ਫਰਵਰੀ 2026 ਦਰਮਿਆਨ ਇਸ ਖਾਤੇ ਵਿੱਚ ਲਗਪਗ 332 ਕਰੋੜ ਰੁਪਏ ਆਏ। ਇਹ ਰਕਮ ਕਥਿਤ ਸ਼ੈੱਲ ਕੰਪਨੀਆਂ, ਵਿਚੋਲੀਆਂ ਇਕਾਈਆਂ ਅਤੇ ਵਿਅਕਤੀਆਂ ਰਾਹੀਂ ਆਈ। ਇਨ੍ਹਾਂ ਵਿੱਚ ਕੈਪਕੋ ਫਿਨਟੈੱਕ ਸਰਵਿਸਿਜ਼, ਸਵਾਸਤਿਕ ਦੇਸ਼ ਪ੍ਰਾਜੈਕਟਸ, ਆਰ ਐੱਸ ਟਰੇਡਰਜ਼, ਚੰਡੀਗੜ੍ਹ ਮੈਗਾ ਸਟੋਰ, ਐੱਸ ਆਰ ਆਰ ਪਲੈਨਿੰਗ ਗੁਰੂਜ਼, ਵਿਸਟਾਮੈੱਡ ਸਲਿਊਸ਼ਨਜ਼, ਮਾਂ ਵੈਭਵ ਲਕਸ਼ਮੀ ਇੰਟੀਰੀਅਰ ਅਤੇ ਰਿਭਵ ਰਿਸ਼ੀ ਦੀ ਪਤਨੀ ਦਿਵਿਆ ਅਰੋੜਾ ਸ਼ਾਮਲ ਹਨ।
ਈ ਡੀ ਨੇ ਦੋਸ਼ ਲਾਇਆ ਕਿ ਸਾਵਨ ਜਿਊਲਰਜ਼ ਰਾਹੀਂ ਕਟੌਦੀਆ ਨੇ ਕਥਿਤ ਅਪਰਾਧ ਦੀ ਕਮਾਈ ਨੂੰ ਟਿਕਾਣੇ ਲਾਉਣ ਅਤੇ ਛੁਪਾਉਣ ਵਿੱਚ ਰਿਭਵ ਰਿਸ਼ੀ ਦੀ ਮਦਦ ਕੀਤੀ। ਜਾਂਚ ਏਜੰਸੀ ਅਨੁਸਾਰ ਇਸ ਰਕਮ ਨੂੰ ਕਾਰੋਬਾਰੀ ਗਤੀਵਿਧੀਆਂ ਵਿੱਚ ਵਰਤ ਕੇ ਪੇਸ਼ ਕੀਤਾ ਗਿਆ। ਰਿਭਵ ਰਿਸ਼ੀ ਨਾਲ ਸਾਂਝ ਪੈਣ ਮਗਰੋਂ ਫਰਮ ਵੱਲੋਂ ਖ਼ਰੀਦ ਵਿੱਚ ਵੀ ਅਚਾਨਕ ਵੱਡਾ ਵਾਧਾ ਹੋਇਆ। ਇਸ ਮਾਮਲੇ ਵਿੱਚ ਈ ਡੀ ਪਹਿਲਾਂ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ। ਜਾਂਚ ਦੌਰਾਨ ਲਗਪਗ 225 ਕਰੋੜ ਰੁਪਏ ਦੀਆਂ ਚੱਲ ਅਤੇ ਅਚੱਲ ਜਾਇਦਾਦਾਂ ਕੁਰਕ, ਜ਼ਬਤ ਜਾਂ ਜਾਮ ਕੀਤੀਆਂ ਗਈਆਂ ਹਨ। ਏਜੰਸੀ ਨੇ ਪੰਚਕੂਲਾ ਦੀ ਵਿਸ਼ੇਸ਼ ਅਦਾਲਤ ਵਿੱਚ 14 ਮੁਲਜ਼ਮਾਂ ਵਿਰੁੱਧ ਮੁਕੱਦਮਾ ਚਲਾਉਣ ਲਈ ਸ਼ਿਕਾਇਤ ਵੀ ਦਾਇਰ ਕੀਤੀ ਹੈ। ਪੰਜਾਬ ਅਤੇ ਹਰਿਆਣਾ ਦੀਆਂ ਤਾਜ਼ਾ ਖ਼ਬਰਾਂ ਅਤੇ ਹੋਰ ਅਪਡੇਟਾਂ ਲਈ ਪਾਠਕ Today Updates ਅਤੇ Indian Updates ਪੋਡਕਾਸਟ ਸੁਣ ਸਕਦੇ ਹਨ।
Frequently Asked Questions
ਈਡੀ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਜਿਊਲਰ ਦਾ ਕੀ ਨਾਮ ਹੈ ਅਤੇ ਉਹ ਕਿਸ ਫਰਮ ਨਾਲ ਸਬੰਧਤ ਹੈ?
ਇਸ ਘੁਟਾਲੇ ਵਿੱਚ ਰਾਜਨ ਸਿੰਘ ਕਟੌਦੀਆ ਦੇ ਖਾਤੇ ਵਿੱਚ ਕਿੰਨੀ ਰਕਮ ਆਈ ਸੀ?
ਪੰਚਕੂਲਾ ਦੀ ਵਿਸ਼ੇਸ਼ ਅਦਾਲਤ ਨੇ ਮੁਲਜ਼ਮ ਜਿਊਲਰ ਨੂੰ ਕਿੰਨੇ ਦਿਨਾਂ ਦੇ ਰਿਮਾਂਡ ’ਤੇ ਭੇਜਿਆ ਹੈ?
ਇਸ ਪੂਰੇ ਘੁਟਾਲੇ ਵਿੱਚ ਕੁੱਲ ਕਿੰਨੀ ਰਕਮ ਦੇ ਗਬਨ ਦਾ ਦੋਸ਼ ਲਾਇਆ ਗਿਆ ਹੈ?
ਜਾਂਚ ਏਜੰਸੀ ਈਡੀ ਵੱਲੋਂ ਹੁਣ ਤੱਕ ਇਸ ਕੇਸ ਵਿੱਚ ਕੀ ਕਾਰਵਾਈ ਕੀਤੀ ਗਈ ਹੈ?
What's Your Reaction?
